គម្រោងផ្លូវល្បឿនលឿនចម្ងាយ ៥១គម ពីទីក្រុងហូជីមិញមកកាន់ច្រកព្រំដែនអន្តរជាតិវៀតណាម-កម្ពុជា ម៉ុកបៃ នៅពេលសាងសង់រួចរាល់ នឹងជួយសម្រួលចរាចរណ៍ផ្លូវជាតិលេខ២២ របស់វៀតណាមផង និងបង្កើនការតភ្ជាប់ជាមួយប្រទេសកម្ពុជាក្បែរខាងផង ។
ច្រកព្រំដែនអន្តរជាតិម៉ុកបៃ ស្ថិតនៅក្នុងខេត្តតៃនិញ ជាប់នឹងទីក្រុងបាវិត ខេត្តស្វាយរៀងរបស់កម្ពុជា ។
ផ្លូវល្បឿនលឿននេះនឹងធ្វើឱ្យការធ្វើដំណើរពីទីក្រុងហូជីមិញ មកច្រកព្រំដែន ម៉ុកបៃ-បាវិត កាន់តែងាយស្រួលនិងលឿនជាងមុន ដូច្នេះ សម្រួលទាំងការធ្វើដំណើររបស់មនុស្ស និងទាំងការចរាចរទំនិញ ។
សារព័ត៌មានវៀតណាមបានផ្សាយថា គម្រោងផ្លូវល្បឿនលឿននេះនឹងចំណាយថវិកា ៧៨៨លានដុល្លារ និងគ្រោងបញ្ចប់ការសាងសង់ នៅឆ្នាំ២០២៧ ។
នៅដំណាក់កាលដំបូង ផ្លូវល្បឿនលឿននេះនឹងមានផ្លូវធម្មតា ៤គន្លង និងផ្លូវអាសន្ន ២គន្លង ។ ទៅថ្ងៃអនាគត គេគ្រោងពង្រីកផ្លូវធម្មតាទៅដល់ ៦គន្លង ។
គម្រោងនេះពាក់ព័ន្ធនឹងដើមទុនថវិការដ្ឋវៀតណាម ៤៩% និង ៥១% ទៀត ជាថវិកាពីវិនិយោគិនឯកជន ។ បន្ទាប់ពីប្រតិបត្តិការបាន ១៥ឆ្នាំ ផ្លូវល្បឿនលឿននេះនឹងត្រូវប្រគល់ឱ្យអាជ្ញាធរវៀតណាមគ្រប់គ្រងវិញ ៕
