ក្រុមហ៊ុនផលិតម៉ូតូហុងដា (Honda) របស់ប្រទេសជប៉ុន នឹងចាប់ផ្ដើមលក់ម៉ូតូហុងដាអគ្គិសនីដំបូងគេដែលផលិតនៅប្រទេសវៀតណាម នៅថ្ងៃទី ១២ ខែមេសានេះហើយ ។
ម៉ូតូអគ្គិសនីហុងដា ដែលដំឡើងនៅវៀតណាមជាលើកដំបូងនោះ មានម៉ាក អាយខុន អ៊ី (ICON e) ក្នុងតម្លៃចាប់ពី ១០៤០ ដុល្លារឡើងទៅ ។
ម៉ូតូ ហុងដា អាយខុន អ៊ី (ICON e) ផលិតនៅក្នុងខេត្ត វិញភុក ភាគខាងជើងប្រទេសវៀតណាម ហើយមានបីប្រភេទ គឺ ស្ប៉ត (Sport), ស្ប៉េស្យល (Special) និង ព្រីមៀម (Premium) ។
ក្រុមហ៊ុន ហុងដា នឹងមិនទាន់លក់អាគុយសម្រាប់ម៉ូតូប្រភេទនេះឡើយ ប៉ុន្តែ គ្រោងនឹងជួលអាគុយសម្រាប់ម៉ូតូប្រភេទនេះ ក្នុងតម្លៃ ១៤ ដុល្លារក្នុងមួយខែ ។
អាគុយម៉ូតូនេះ អាចដកយកមកសាកបាននៅផ្ទះ ហើយអាចសាកពេញដោយប្រើពេល ៧,៥ ម៉ោង ហើយអាចបើកបរបានចម្ងាយ ៥០ គីឡូម៉ែត្រ ។
នៅក្នុងប្រទេសវៀតណាម ម៉ូតូ ហុងដា អាយខុន អ៊ី (ICON e) មិនតម្រូវឲ្យអ្នកបើកបរមានប័ណ្ណបើកបរឡើយ ហើយផលិតឡើងដោយផ្ដោតលើសិស្សានុសិស្សសម្រាប់ប្រើប្រាស់ក្នុងការធ្វើដំណើរ។
ក្រុមហ៊ុន ហុងដា ក៏នឹងទិញម៉ូតូនេះត្រលប់មកវិញ ក្នុងរយៈពេលបីឆ្នាំក្រោយ ហើយធ្វើការជួសជុលឡើងវិញ ដើម្បីលក់បន្តទៅឲ្យអតិថិជនផ្សេងទៀត។
ម៉ូតូ ហុងដា ជាម៉ាកយីហោម៉ូតូ ដែលលក់ដាច់ជាងគេក្នុងប្រទេសវៀតណាម ហើយក្ដោបក្ដាប់ទីផ្សាររហូតដល់ទៅ ៨០% ។
