រដ្ឋាភិបាលថៃបានប្ដេជ្ញាថានឹងបង្កើនការនាំចូលថាមពល យន្តហោះ និងផលិតផលកសិកម្មពីសហរដ្ឋអាមេរិកឲ្យកាន់តែច្រើនថែមទៀត ដើម្បីបន្ធូរបន្ថយផលប៉ះពាល់ពីការដំឡើងពន្ធនាំចូលទៅកាន់ទីផ្សារសហរដ្ឋអាមេរិក ។ នេះបើយោងតាមការចុះផ្សាយរបស់កាសែត បាងកកប៉ុស្តិ៍ ដែលបានដកស្រង់សម្ដី នាយករដ្ឋមន្ត្រី លោកស្រី ពេតុងតាន ស៊ីណាវ៉ាត ។
គួរបញ្ជាក់ថា ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីសប្ដាហ៍មុន បានប្រកាសដំឡើងពន្ធនាំចូលសម្រាប់ទំនិញពីប្រទេសថៃ រហូតដល់ទៅ ៣៦% ។
នៅក្នុងសប្ដាហ៍នេះ រដ្ឋមន្ត្រីហិរញ្ញវត្ថុថៃ លោក ពិឆៃ ឈុនហាវ៉ាជីរ៉ា នឹងដឹកនាំគណៈប្រតិភូថៃ ទៅកាន់សហរដ្ឋអាមេរិក ដើម្បីពិភាក្សាលើបញ្ហាពាណិជ្ជកម្មរវាងប្រទេសទាំងពីរ ហើយគ្រោងនឹងប្រាប់សហរដ្ឋអាមេរិកថា ប្រទេសថៃ មិនត្រឹមតែជាទិសដៅនាំចេញសម្រាប់ទំនិញអាមេរិកប៉ុណ្ណោះទេ ប៉ុន្តែ ក៏ជាដៃគូជាទីទុកចិត្តរបស់សហរដ្ឋអាមេរិកផងដែរ ។
ការប្រកាសពីការប្ដេជ្ញាចិត្តរបស់ លោកស្រី ពេតុងតាន ស៊ីណាវ៉ាត គឺធ្វើឡើងតាមរយៈសេចក្ដីប្រកាសព័ត៌មាន ក្រោយពេលដែលមានការរិះគន់ថា រដ្ឋាភិបាលរបស់លោកស្រី ហាក់មានភាពយឺតយ៉ាវក្នុងការឆ្លើយតបចំពោះការដំឡើងពន្ធនាំចូលដែលប្រកាសដោយលោក ដូណាល់ ត្រាំ ។ ការមិនពេញចិត្តចំពោះភាពយឺតយ៉ាវរបស់រដ្ឋាភិបាលថៃនេះ គឺដោយសារតែមានការប្រៀបធៀបជាមួយនឹងប្រតិកម្មភ្លាមៗ ពីសំណាក់មេដឹកនាំប្រទេសអាស៊ានផ្សេងទៀត ។
