ធនាគារ អេស៊ីលីដា បានចុះអនុស្សរណៈនៃការយោគយល់គ្នា ជាមួយ សមាគមអ៊ីស្លាម អាម៉ាណះតាកាហ្វុលកម្ពុជា ហៅកាត់ថា កាតា (CATA) ស្តីពី ការអនុវត្តកម្មវិធីគម្រោង “លុយខ្ញុំស្អាត”។
ពិធីចុះ អនុស្សរណៈនេះធ្វើឡើង ក្រោមអធិបតីភាព របស់អ្នកឧកញ៉ា ដាតុ បណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមប្រឹក្សាសមាគមអាម៉ាណះតាកាហ្វុលកម្ពុជា និងបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី ។
អ្នកឧកញ៉ា ដាតុ បណ្ឌិត អូស្មាន ហាស្សាន់ មានប្រសាសន៍ថា គម្រោង “លុយខ្ញុំស្អាត” នេះ ត្រូវបានរៀបចំឡើង ដើម្បីអនុញ្ញាតឱ្យពលរដ្ឋខ្មែរអ៊ីស្លាម អាចទុកដាក់ប្រាក់នៅធានគារបានដោយសុវត្ថិភាព និងមិនបាត់បង់ ហើយថែមទាំងត្រឹមត្រូវតាមច្បាប់វិន័យរបស់សាសនាអ៊ីស្លាមថែមទៀត ។
អ្នកឧកញ៉ា ដាតុ បណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស មានប្រសាសន៍ថា៖ “អ្វីដែលមានការលំបាកកន្លងមកនោះគឺដោយសារតែបងប្អូនយើង គឺប្រកាន់ខ្ជាប់ខ្ជួននូវច្បាប់របស់អ៊ីស្លាម ហើយនៅពេលដែល ការប្រកាន់ខ្ជាប់ខ្ជួននេះហើយដែលធ្វើឲ្យគាត់មិនអាចធ្វើអ្វីដែលខុសពីច្បាប់របស់អ៊ីស្លាម ។ ចឹងបានហើយបានជាសហគមន៍អ៊ីស្លាម ថ្នាក់ដឹកនាំអ៊ីស្លាមនឹកថា រកមធ្យោបាយអ្វីមួយ ដើម្បីឱ្យគាត់នឹងមានការទទួលបានសេវាដូចជាប្រជាពលរដ្ឋយើងជាទូទៅ នៅកម្ពុជាដែរ ហើយសម្រួលជូនគាត់ ហើយក៏ដូចជាការពារប្រយោជន៍ជូនគាត់ ។ កន្លងទៅ គឺថា តែងតែមានការស្នើ ការសំណូមពរពីបងប្អូនយើងជាទូទៅ ថាធ្វើម៉េចមានធនាគារណាមួយដែលអាចរក្សាទុកប្រាក់ស្អាតជូនគាត់បាន។ គាត់អត់ចង់បានកម្រៃពីការប្រាក់ ឬក៏អត្ថប្រយោជន៍ផ្សេងៗនោះ យកទៅឡូកឡំជាមួយលុយរបស់គាត់ទេ ។ ព្រោះកាលណាឡូកឡំទៅ វាមានការខ្វែងជាមួយនឹងច្បាប់របស់អ៊ីស្លាម ដែលហៅច្បាប់សារីអះហ្នឹង ។ អ៊ីចឹងបានជាគាត់ បានឯកភាពថា បើសិនជាមាន ពួកគាត់នឹងមកបើកគណនីជាមួយធនាគារ ហើយប្រាក់កម្រៃផ្សេងៗ គាត់ឱ្យធនាគារកាត់ចូលទៅសមាគម ដើម្បីយកទៅបម្រើផលប្រយោជន៍អី្វដែលត្រឹមត្រូវទៅតាមច្បាប់របស់អ៊ីស្លាម ដូចជាយកទៅសាងសង់ធ្វើផ្លូវ ធ្វើមន្ទីរពេទ្យ ធ្វើសាលារៀន ធ្វើអ្វីផ្សេងៗដែលស្របជាមួយនឹងច្បាប់ហ្នឹង” ។
បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា ភាពជាដៃគូនេះ បានផ្តល់នូវមធ្យោបាយហិរញ្ញវត្ថុប្រកបដោយតម្លាភាព និងសុវត្ថិភាព ទៅតាមគោលការណ៍នៃកម្មវិធីគម្រោង “លុយខ្ញុំស្អាត” របស់សមាគមអាម៉ាណះតាកាហ្វុលកម្ពុជា ដែលអនុញ្ញាតឱ្យបងប្អូនខ្មែរឥស្លាមអាចដាក់ប្រាក់សន្សំក្នុងគម្រោង “លុយខ្ញុំស្អាត” ហើយការប្រាក់ដែលទទួលបាននឹងបរិច្ចាគដោយស្ម័គ្រចិត្ត នឹងកាត់ចេញដោយស្វ័យប្រវត្តិចូលទៅគណនី CATA ដែលមាននៅ ធនាគារ អេស៊ីលីដា សម្រាប់ប្រើប្រាស់នៅក្នុងគម្រោងសហគមន៍ និងសកម្មភាពសប្បុរសធម៌នានា នៅក្នុងគម្រោង “លុយខ្ញុំស្អាត” ។”
បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា មានប្រសាសន៍ថា៖ “ខ្ញុំមានធនធានមនុស្សរបស់យើងដែលជាអ្នកកាន់សាសនាអ៊ីស្លាមហើយស្រាប់ ហៅថាខ្មែរអ៊ីស្លាម ដែលបម្រើជាបុគ្គលិករបស់ធនាគារអេស៊ីលីដា នៅគ្រប់សាខាខេត្តក្រុងទាំងអស់ ៤០ នាក់ជាង ហើយគាត់នៅតាមបញ្ជរទាំងអស់ ហើយយើងរៀបចំបញ្ជរសម្រាប់បម្រើសហគមន៍អ៊ីស្លាម។ ពេលគាត់ទៅ គឺយើងមានទម្រង់ សម្រាប់បើកគណនី បើកអីសម្រាប់បម្រើជូនគាត់ យើងកត់ត្រាទុក នៅក្នុងប្រព័ន្ធរបស់យើងថា អ៊ីស្លាមចឹងទៅ ដើម្បីឲ្យយើងអនុលោមឲ្យត្រូវជាមួយនឹងអនុស្សរណៈរបស់យើង ដែលកាតាគាត់ចង់បាន ដើម្បីឲ្យយើងងាយស្រួលក្នុងការកាត់កងការប្រាក់ដើម្បីបញ្ចូលទៅក្នុងគណនីរបស់កាតា ។ ចឹងយើងមានបុគ្គលិកសម្រាប់បម្រើការ យើងមានទម្រង់បែបបទតម្រូវទៅតាមបងប្អូនខ្មែរអ៊ីស្លាម ហើយយើងមានមធ្យោបាយជូនដំណឹងទៅគាត់ ហើយយើងសហប្រតិបត្តិការជាមួយកាតា” ។
