គិតតរឹមដំណាច់ឆ្នាំ ២០២៤ ប្រទេសវៀតណាមមានក្រុមហ៊ុនបច្ចេកវិទ្យាឌីជីថលជិត ៧៣.៨០០ ក្រុមហ៊ុន គឺបានកើនឡើងខ្ទង់ ១០% បើធៀបនឹងឆ្នាំ ២០២៣ ហើយផ្ដល់ការងារធ្វើដល់ប្រជាជនចំនួន ១,២៦ លាននាក់។
វិស័យបច្ចេកវិទ្យាព័ត៌មាន (ICT) របស់ប្រទេសវៀតណាម ត្រូវបានរំពឹងថា នឹងអាចរកចំណូលបានរហូតដល់ទៅ ជិត ១៧០ ពាន់លានដុល្លារ គិតត្រឹមឆ្នាំ ២០២៥ នេះ ។ នេះបើយោងតាមសារព័ត៌មានវៀតណាម ដែលបានដកស្រង់របាយការណ៍ពីក្រសួងព័ត៌មាន និងសារគមនាគមន៍។
ក្រសួងព័ត៌មាន និងសារគមនាគមន៍របស់វៀតណាម ក៏បានលើកឡើងផងដែរថា ការនាំចេញផ្នែករឹង (ហាដវ៉ែរ) និងគ្រឿងអេឡិកត្រូនិក ដែលជាគ្រឿងសំខាន់នៅក្នុងឧស្សាហកម្មបច្ចេកវិទ្យាព័ត៌មាននោះ នឹងអាចមានទំហំទឹកប្រាក់រហូតដល់ទៅ ជាង ១៤៨ ពាន់លានដុល្លារ។
បច្ចុប្បន្ននេះ ប្រទេសវៀតណាម ត្រូវបានគេកត់សម្គាល់ថា កំពុងតែសំញែងខ្លួនខ្លាំងឡើងនៅក្នុងវិស័យបច្ចេកវិទ្យាព័ត៌មាន (ICT) បន្ទាប់ពីក្រុមហ៊ុនបច្ចេកវិទ្យាព័ត៌មានរបស់វៀតណាមបន្តរកចំណូលកាន់តែច្រើនឡើងៗ។
ប្រទេសវៀតណាមស្ថិតក្នុងចំណាត់ថ្នាក់ទីពីរ សម្រាប់ការនាំចេញទូរស័ព្ទស្មាតហ្វូន ជាប់ចំណាត់ថ្នាក់លេខ ៥ សម្រាប់ការនាំចេញគ្រឿងបង្គំកុំព្យូទ័រ និងជាប់ចំណាត់ថ្នាក់លេខ ៨ សម្រាប់ការនាំចេញបរិក្ខាអេឡិកត្រូនិក ។
