សំណុំរឿងឆបោករបស់ក្រុមហ៊ុន អាយខន់ គ្រុប (iCon Group) នៅថៃ បានលេចឡើងបន្ថែមទៀតនូវជនរងគ្រោះរាប់រយនាក់នៅក្នុងប្រទេសឡាវ មីយ៉ាន់ម៉ា កម្ពុជា និងជប៉ុន ចំណែកឯជនរងគ្រោះនៅថៃដែលបានចេញមកដាក់ពាក្យបណ្ដឹង កើនឡើងលើស ៥០០នាក់ហើយ ។
យោងតាមសារព័ត៌មាន ឌឹ ណេស្ហិន របស់ថៃ ប៉ូលិសបាននិយាយថា គិតត្រឹមថ្ងៃអាទិត្យ ចំនួនអ្នកប្ដឹងនៅប្រទេសថៃបានកើនឡើងលើស ៥០០នាក់ហើយ ដោយទាមទារសំណងជំងឺចិត្តជាង ២០០លានបាត (ឬប្រហែល ៦លានដុល្លារអាមេរិក) ។
ជនរងគ្រោះបានប្រាប់ប៉ូលិសថា ក្រុមហ៊ុនបានអូសទាញពួកគេឱ្យធ្វើជាអ្នកលក់ ឬអ្នកចែកចាយផលិតផលអាហារបំប៉នរបស់ក្រុមហ៊ុន ដោយសន្យាថា ផលិតផលទាំងនោះនឹងលក់ដាច់ខ្លាំង ។
ប៉ុន្តែ នៅទីបំផុត ជនរងគ្រោះលក់ផលិតផលមិនដាច់ ហើយត្រូវក្រុមហ៊ុនឆបោកប្រាប់ឱ្យជ្រើសរើស«អ្នកចែកចាយបន្ត» ឱ្យធ្វើការក្រោមពួកគេ ដើម្បីទទួលបានប្រាក់កម្រៃជើងសារពីប្រាក់វិនិយោគរបស់អ្នកចែកចាយថ្មីទាំងនោះ ។
អ្នកប្រើប្រាស់បណ្ដាញសង្គមនៅថៃ បានចែករំលែកផុសនានា ដែលបង្ហាញថា ជនរងគ្រោះមិនមែនមានតែនៅក្នុងប្រទេសថៃនោះទេ ប៉ុន្តែ ក៏មានផងដែរ នៅប្រទេសជិតខាងថៃ ដូចជា ឡាវ កម្ពុជា និងមីយ៉ាន់ម៉ា មិនតែប៉ុណ្ណោះ នៅជប៉ុន ក៏មានជនរងគ្រោះដែរ ។
នៅឡាវ គេបានចែករំលែកវីដេអូគ្លីប មេធំរបស់ក្រុមហ៊ុន iCon Group ដែលមាននាមហៅក្រៅ Boss Paul បើកសម្ពោធក្រុមហ៊ុនអាជីវកម្មនៅប្រទេសឡាវ កាលពីប៉ុន្មានឆ្នាំមុន ។ នៅប្រទេសឡាវ គេបានរាយការណ៍ថា ក្រុមហ៊ុន អាយខន់ គ្រុប ជ្រើសរើសសមាជិកបានជាង ១០០០នាក់ ក្នុងនោះមានទាំងតារាល្បីៗនៅក្នុងវិស័យកម្សាន្តរបស់ឡាវ ផងដែរ ។
នៅកម្ពុជា និងមីយ៉ាន់ម៉ា តារាថៃល្បីល្បាញ ៣រូប ដែលមានឈ្មោះជាមន្ត្រីប្រតិបត្តិរបស់ក្រុមហ៊ុន អាយខន់ គ្រុប ក៏បានផ្សព្វផ្សាយពីសាខា អាយខន់ គ្រុប នៅកម្ពុជា និងមីយ៉ាន់ម៉ា ផងដែរ និងថែមទាំងបានអំពាវនាវឱ្យប្រជាជនក្នុងប្រទេសទាំងពីរនេះ ចូលរួមបោះទុនវិនិយោគដើម្បីក្លាយជាបណ្ដាញចែកចាយរបស់ក្រុមហ៊ុនថែមទៀតផង ៕
