ក្នុងរយៈកាល៩ខែនៃឆ្នាំនេះ វៀតណាមបាននាំចេញអង្ករបានរហូតដល់ទៅ ៧លានតោន គិតជាទឹកប្រាក់ប្រមាណ ៤៣៧០លានដុល្លារ ។
តម្លៃអង្ករវៀតណាមនាំចេញជាមធ្យម គឺ ៦២៤ ដុល្លារក្នុងមួយតោន ដែលតម្លៃនេះកើនឡើងជាង ១៣% ធៀបនឹងឆ្នាំមុន ។
កាលពីពេលថ្មីៗ ឥណ្ឌាបានលុបចោលបម្រាមនាំចេញអង្កររបស់ខ្លួនទៅកាន់ទីផ្សារអន្តរជាតិ ប៉ុន្តែ អ្នកជំនាញវៀតណាមបាននិយាយថា ប្រព័ន្ធអេកូឡូស៊ីនៃច្រវាក់តម្លៃអង្កររបស់វៀតណាម ត្រូវបានរៀបចំយ៉ាងរឹងមាំ ហើយនឹងមិនរងផលប៉ះពាល់ធ្ងន់ធ្ងរឡើយ នៅពេលដែលឥណ្ឌាចាប់ផ្ដើមនាំចេញអង្ករឡើងវិញនោះ ។
អ្នកនាំចេញអង្ករវៀតណាមជឿថា ការសម្រេចចិត្តរបស់ឥណ្ឌាក្នុងការបើកឲ្យនាំចេញអង្ករឡើងវិញ នឹងដាក់សម្ពាធទៅលើតម្លៃរបស់អង្ករនៅលើទីផ្សារ ប៉ុន្តែតម្លៃអង្ករវៀតណាមប្រហែលជាមិនអាចធ្លាក់ក្រោម ៥០០ដុល្លារក្នុងមួយតោននោះទេ ។
ក្នុងពេលថ្មីៗ វៀតណាមបានឈ្នះការដេញថ្លៃផ្គត់ផ្គង់អង្ករជិត ៦ម៉ឺនតោនដល់ប្រទេសឥណ្ឌូណេស៊ី ក្នុងតម្លៃ ៥៤៨ដុល្លារក្នុងមួយតោន គឺបានធ្លាក់ចុះ ៣២ ដុល្លារបើធៀបនឹងតម្លៃដេញថ្លៃកាលពីលើកមុន ៕
