នៅថ្ងៃពុធនេះ អូស្ត្រាលីបានផ្ដល់ភ្លើងខៀវដល់គម្រោងថាមពលពន្លឺព្រះអាទិត្យមួយ ដែលមានទឹកប្រាក់ ១ម៉ឺន ៣៥០០លានដុល្លារអាមេរិក ដែលគ្រោងនាំចេញថាមពលពីកសិដ្ឋានសូឡាយក្សមួយនៅភាគជើងប្រទេសអូស្ត្រាលី ទៅសិង្ហបុរី តាមខ្សែកាបបាតសមុទ្រប្រវែង ៤៣០០គីឡូម៉ែត្រ ។
រដ្ឋមន្ត្រីបរិស្ថានអូស្ត្រាលី និយាយថា គម្រោងតភ្ជាប់ថាមពលអូស្ត្រាលី-អាស៊ីនេះ នឹងឆ្លើយតបទៅនឹងតម្រូវការថាមពលកកើតឡើងវិញដែលកើនឡើង ទាំងនៅក្នុងស្រុក និងទាំងនៅក្រៅប្រទេស ។
នៅក្រោមគម្រោងនេះ កសិដ្ឋានសូឡាដ៏ធំមួយនឹងផលិតថាមពលគ្រប់គ្រាន់សម្រាប់លំនៅឋាន ៣លានខ្នង និងមានខ្សែកាបបាតសមុទ្រមួយខ្សែ តភ្ជាប់អូស្ត្រាលីទៅសិង្ហបុរី ។
គេរំពឹងថា សេចក្ដីសម្រេចចិត្តវិនិយោគចុងក្រោយនឹងធ្វើឡើងនៅឆ្នាំ២០២៧ ហើយការផ្គត់ផ្គង់អគ្គិសនី នឹងចាប់ផ្ដើមនៅរង្វង់ឆ្នាំ២០៣០ជាង ។ នេះបើយោងតាមក្រុមហ៊ុន SunCable ដែលជាអ្នកអនុវត្តគម្រោង ។
គម្រោងនេះនឹងចែកជាពីរដំណាក់កាល និងគ្រោងផ្គត់ផ្គង់ថាមពលបៃតងបានដល់ទៅ ៦មេហ្គាវ៉ាត់ ទៅឱ្យអតិថិជនឧស្សាហកម្មធំៗ នៅទីក្រុង ដវីន នៃដែនដីភាគខាងជើងអូស្ត្រាលី និងឧស្សាហកម្មធំៗនៅសិង្ហបុរី ៕
