ប្រជាជននៅក្នុងភូមិស្វាយអាត់ ឃុំព្រែកតាមាក់ ខេត្តកណ្តាល លែងធ្វើស្រែ ប៉ុន្តែ នាំគ្នាចាប់យកមុខរបរដាំស្មៅវិញ ដែលការដាំស្មៅនេះបានក្លាយជាមុខរបររបស់ប្រជាជននៅក្នុងភូមិនេះជិត ២០ឆ្នាំមកហើយ ខណៈតម្លៃស្មៅលក់ចេញទៅឲ្យឈ្មួញហាក់បីប្រសើរជាងធ្វើស្រូវ ។
អ្នកស្រី គីម សុផេន គឺជាកសិករម្នាក់ដែលបានចាប់យកមុខរបរដាំស្មៅនេះអស់រយៈពេល៦ឆ្នាំមកហើយ អ្នកស្រីបានរៀបរាប់ថា «និយាយទៅ ស្មៅហ្នឹងតម្លៃវាពី ១ដុល្លារឡើង តម្លៃវាថេរអ៊ីចឹងរហូត គ្រាន់តែពេលខ្លះចុះតិចតួច គ្រាន់តែចុះមិនយូរប៉ុន្មានទេ ពី១០ឆ្នាំជាង[មុន] ថ្លៃស្មៅជប៉ុនហ្នឹង ១ការ៉េ ២០ដុល្លារឯណុះ តែគ្រាន់តែពេលហ្នឹងអត់មានឈ្មួញទិញធំទូលាយអ៊ីចឹងទេអូន មានតែឈ្មួញតិចតួច ហើយដាំតាមផ្ទះតិចតួចទេ» ។
កសិកររូបនេះបានបន្តទៀតថា ការដាំស្មៅនៅក្នុងមួយភូមិស្វាយអាត់នេះ គេជ្រើសរើសពូជស្មៅពីរប្រភេទ គឺស្មៅម៉ាឡេនិងស្មៅជប៉ុន ដែលមុននឹងចាប់ផ្តើមដាំ គឺត្រូវធ្វើដីស្រែឲ្យស្អាតនិងស្មើល្អ ទើបយកដើមស្មៅមកដាក់ដាំបាន ហើយស្មៅពីរប្រភេទនេះចាយពេលថែទាំស្រោចទឹកដាក់ជីរយៈពេល៣ខែទើបអាចប្រមូលផលបាន ខណៈស្មៅមួយការ៉េលក់បានតម្លៃប្រមាណជា ៤ពាន់រៀល ។
ស្រ្តីវ័យប្រមាណជា៤០ឆ្នាំរូបនេះបានបន្ថែមថា «ទីផ្សារហ្នឹងវាគ្រាន់ថាល្អជាងស្រូវបន្តិច បើស្រូវយើងធ្វើតែមួយឆ្នាំបានតែម្តង អានេះបើវាចំណេញតិចតួចជា វាបានតរហូតអ៊ីចឹងណាអូន បើធ្វើស្រូវបានតែម្តងហ្នឹង ជួនកាល កណ្ដុរស៊ីអ៊ីចឹងទៅ អត់ បើធ្វើស្មៅ ហានីភ័យតែភ្លៀងមកលិច វាពិបាកយើងធ្វើថែ លុយច្រើន អ្នកខ្លះក៏សល់តិចតួចអ៊ីចឹងទៅ អ្នកខ្លះគ្រាន់តែមួយចាយៗអ៊ីចឹងទៅ »។
យ៉ាងណាមិញ សម្រាប់ទីផ្សារស្មៅនេះ បច្ចុប្បន្នមានការផ្គត់ផ្គង់ស្ទើរតែគ្រប់ខេត្តក្រុងទៅហើយ ភាគច្រើនមានតាមបណ្តាខេត្ត ដូចជា មណ្ឌលគិរី គិរីរម្យ (កំពង់ស្ពឺ ) កោះកុង កំពង់សោម ជាដើម ដែលភាគច្រើនគេទិញទៅយកទៅរៀបតាមសួនច្បារ រីហ្សត តាមទ្រូងផ្លូវ ព្រលានយន្តហោះ ផ្ទះល្វែង និងតាមបុរីជាដើម ។
អ្នកស្រីបានបញ្ជាក់ថា ទោះបីជាតម្លៃស្មៅទាំងពីរប្រភេទនេះ វាមានតម្លៃជាងស្រួវក៏ពិតមែន ប៉ុន្តែ ការដាំដុះការមើលថែស្មៅនេះ ក៏ច្រើនណាស់ដែរ ពោលគឺត្រូវការចំណាយដើមទុនច្រើនណាស់ដែរ ដោយក្នុង១ពាន់ការ៉េ ចំណាយទុនដំបូងបង្អស់ គឺ ១ពាន់ដុល្លារ ហើយត្រូវការយកចិត្តទុកដាក់មើលថែជាងស្រូវទៅទៀត បើស្មៅមិនល្អ ឈ្មួញឲ្យតម្លៃក៏ទាបដែរ ។
គួរបញ្ជាក់ថា ទោះបីជាទីផ្សារស្មៅមានតម្លៃឡើងចុះ ហើយត្រូវការមើលថែច្រើនយ៉ាងណាក៏ដោយ ប៉ុន្តែអ្នកភូមិស្វាយអាត់ នៅតែបន្តនាំគ្នាដាំ ដោយមួយរដូវកាល អាចធ្វើបាន៣ដង ហើយប្រជាជននៅក្នុងភូមិនេះបន្តធ្វើ រហូតក្លាយជាមុខរបរប្រពៃណីមកដល់បច្ចុប្បន្ន ៕
