ផលិតផលកសិកម្មរបស់ប្រទេសវៀតណាម នាំចេញកាន់តែច្រើនឡើងទៅកាន់ប្រទេសកូរ៉េខាងត្បូង ក្នុងនោះក្នុងរយៈពេល ៦ ខែ នៃឆ្នាំ ២០២៤ នេះ ការនាំចេញផលិតផលកសិកម្ម មានទំហំទឹកប្រាក់ ១៦៤ លានដុល្លារ ដែលបានកើនឡើង ៥៥% បើធៀបនឹងរយៈពេលដូចគ្នាកាលពីឆ្នាំមុន ។
កំណើនការនាំកសិផលពីប្រទេសវៀតណាមទៅកាន់ប្រទេសកូរ៉េខាងត្បូងនេះក៏ដោយសារតែតម្រូវការពីអ្នកប្រើប្រាស់បានកើនឡើងផងដែរ ។
លោក ជឿង ជូន ឃ្យូ (Jeong Joon Kyu) នាយកប្រតិបត្តិទីភ្នាក់ងារជំរុញពាណិជ្ជកម្ម និងវិនិយោគកូរ៉េ ប្រចាំក្រុងហូជីមិញ ប្រទេសវៀតណាម បានថ្លែងថា៖ “ផលិតផលកសិកម្មជាច្រើនរបស់វៀតណាមទទួលបានការគាំទ្រពីអ្នកប្រើប្រាស់នៅប្រទេសកូរ៉េ ដោយសារតែគុណភាព និងតម្លៃមានភាពប្រកួតប្រជែង” ។
ការនាំចេញកាហ្វេពីប្រទេសវៀតណាមទៅកាន់ប្រទេសកូរ៉េខាងត្បូង មានទំហំទឹកប្រាក់ ៧៥,៦ លានដុល្លារ ដែលបានកើនឡើង ៣៩% ហើយការនាំចេញម្រេចវិញ គឺបានចំណូលជិត ២០ លានដុល្លារ ដែលកើនឡើងរហូតដល់ទៅ ១៤៧% ។
អគ្គលេខាធិការសមាគមផ្លែឈើ និងបន្លែវៀតណាម លោក ដាញ់ ភុកង្វៀន បានថ្លែងថា ប្រទេសកូរ៉េខាងត្បូងបានក្លាយជា ទីផ្សារនាំចេញធំបំផុតទីពីរសម្រាប់ផ្លែឈើ និងបន្លែពីប្រទេសវៀតណាម ។
លោកបានបន្តថា កសិផលនាំចេញច្រើនទៅប្រទេសកូរ៉េខាងត្បូង រួមមាន ស្វាយ មៀន ស្រកានាគ ចេក ម្នាស់ និងទុរេន ។
ផលិតផលនាំចេញផ្សេងទៀត ដូចជាគ្រឿងបង្គំអេឡិចត្រូនិក កុំព្យូទ័រ ទូរស័ព្ទ គ្រឿងចក្រ និងវាយនភណ្ឌ បានកើនឡើងផងដែរ ទៅកាន់ប្រទេសកូរ៉េខាងត្បូង ៕
