ការនាំចេញផ្លែទុរេនរបស់វៀតណាមក្នុងរយៈពេល៥ខែដើមឆ្នាំនេះ បានកើនឡើងដល់ទៅ ៧៤% បើធៀបនឹងរយៈពេលដូចគ្នាកាលពីឆ្នាំមុន ដោយបានចំណូលរហូតដល់ទៅ ៩១៩ លានដុល្លារ ។ នេះបើយោងតាមការចុះផ្សាយរបស់សារព័ត៌មានវៀតណាម ដោយផ្អែកលើទិន្នន័យគយ ។
តាមរយៈតួលេខនេះ ធ្វើឲ្យទុរេនបានក្លាយជាផ្លែឈើនាំចេញបានចំណូលច្រើនជាងគេបំផុតសម្រាប់ប្រទេសវៀតណាម ។
ការនាំចេញទុរេនក្នុងខែឧសភា បានប្រាក់ចំណូលរហូតដល់ទៅ ៤៥០ លានដុល្លារទៅហើយ ។
ចំណែកឯនៅខែមិថុនា វិញ គេប៉ាន់ប្រមាណថា ការនាំចេញទុរេនរបស់វៀតណាមអាចទទួលបានចំណូល ៦០០ លានដុល្លារបន្ថែមទៀត ។ នេះបើយោងតាមលោក ដាង ភុកង្វៀន អគ្គលេខាធិការសមាគមផ្លែឈើ និងបន្លែវៀតណាម ។
លោកបានបន្តថា ប្រទេសចិនគឺជាទីផ្សារធំបំផុតសម្រាប់ទុរេនវៀតណាម ក្នុងឆ្នាំនេះ។
ប្រទេសវៀតណាមប្រមូលផលទុរេនបានពេញមួយឆ្នាំ ដែលធ្វើឲ្យវៀតណាមអាចគេចចេញពីការប្រកួតប្រជែងដោយផ្ទាល់ជាមួយនឹងប្រទេសថៃ ពីព្រោះប្រទេសថៃ ប្រមូលផលទុរេនតាមរដូវកាលប៉ុណ្ណោះ ។
ដោយសារតែប្រទេសវៀតណាមនៅជាប់នឹងប្រទេសចិន ដូច្នេះ ការដឹកជញ្ជូនមានការចំណាយទាប និងឆាប់រហ័ស។
ទោះជាយ៉ាងណា លោក ដាង ភុកង្វៀន បានឲ្យដឹងថា កសិផលទុរេនមួយចំនួនត្រូវបានប្រទេសចិនបិទមិនឲ្យនាំចូល ដោយសារតែផ្ទុកសារធាតុហាមឃាត់ ដោយបានប៉ះពាល់មកលើកេរ្តិ៍ឈ្មោះទុរេនវៀតណាមផងដែរ ៕
