មាន់ស្កួយគឺជាពូជមាន់នៅក្នុងស្រុក ភាគច្រើនមានការនិយមចិញ្ចឹមនៅក្នុងទឹកដីខេត្តតាកែវ កំពត ព្រៃវែង ជាដើម ដែលកសិករឆ្លៀតពេលទំនេរចិញ្ចឹមជាលក្ខណៈគ្រួសារ ឬធ្វើអាជីវកម្មផ្សេងៗ ។ វាជាប្រភពចំណូលមួយផ្នែកបន្ថែមសម្រាប់ផ្គត់ផ្គង់ជីវភាពគ្រួសារ ។
លោក សុខ ខុម គឺជាកសិករម្នាក់ដែលរស់នៅក្នុងភូមិល្អាង ស្រុកដងទង់ ខេត្តកំពត ។ លោកបានចាប់យកមកមុខរបរចិញ្ចឹមមាន់ស្កួយរយៈពេលប្រមាណជាជិត១ឆ្នាំហើយ ដែលបច្ចុប្បន្ន លោកចិញ្ចឹមមាន់សរុបជិត២ពាន់ក្បាលទាំងធំទាំងតូច ។
លោកបានរៀបរាប់ប្រាប់ថា «ការចិញ្ចឹមមាន់នេះវាដូចថា វាជួយយើង មុខរបរខាងនោះ (លក់ដើមឈើហូបផ្លែ) ពេលទំនេរៗយើងមកចិញ្ចឹមមាន់នេះមក រួចដៃពីមុខរបរយើងនោះណា មកចិញ្ចឹមមាន់នៅក្រោយនេះមក វាឲ្យពេលទំនេរៗពីការងាររបស់យើង អាចមកចិញ្ចឹមបានច្រើនអ៊ីចឹង ។»
លោកបានបន្តថា មុខរបរចិញ្ចឹមមាន់នេះដែរ មិនបានរៀនមកពីសាលានោះទេ ប៉ុន្តែ លោកគ្រាន់តែឃើញមិត្តភក្តិគេធ្លាប់ចិញ្ចឹមពីមុនៗមក គេប្រាប់តៗគ្នា ហើយក៏ចេះតែចិញ្ចឹមទៅ ដោយពេលអនុវត្តជាក់ស្តែងក៏ទទួលបានផល ពោលគឺរយៈពេលប្រមាណជា៧ខែ កាចិញ្ចឹមមាន់របស់លោកជោគជ័យស្ទើរតែ៧០ភាគរយទៅហើយ ។
កសិកររូបនេះបានបន្ថែមទៀតថា «មាន់ស្កួយហ្នឹង វាចិញ្ចឹមទៅ ធំលឿន វាល្អ ស្រួលចិញ្ចឹម មានស្កួយនេះបើតាមពិតទៅ បើយើងចិញ្ចឹមទៅ តម្លៃវាអាចនឹងលើស លើសពីមាន់ស្រែ ប៉ុន្តែ វាគ្រាន់ថានៅទីនេះវាដូចថាមិនសូវមានមាន់ស្កួយ អ៊ីចឹងតម្លៃវាធម្មតាជាមួយនឹងមាន់ស្រែដែរទេ ។»
យ៉ាងណាមិញ តម្លៃមាន់ស្កួយនៅលើទីផ្សារបច្ចុប្បន្ននេះវាឡើងចុះ ដែលកាលពីមុន លោកអាចលក់បានចន្លោះ ២៥០ក្បាល ទៅ ៣០០ក្បាលក្នុងមួយខែ ហើយតម្លៃវិញ ក្នុងមួយក្បាលរហូតដល់ ២ម៉ឺន៤ពាន់រៀល បើគិតពីចំណូលវិញ ២ ទៅ ៣លានរៀលក្នុងមួយខែ ។
ប៉ុន្តែ ឥឡូវរាងធ្លាក់ចុះដោយក្នុងមួយខែ លក់បានត្រឹមតែប្រមាណជា ១០០ក្បាលតែប៉ុណ្ណោះ ក្នុងតម្លៃប្រហែល ១ម៉ឺន៧ពាន់ទេ តម្លៃនេះចេញពីឈ្មួញកណ្តាល ។
លោកបានបញ្ជាក់ថា ទោះបីជាទីផ្សារមាន់ស្កួយ ឬទីផ្សារមាន់ស្រែទូទៅមានតម្លៃឡើងចុះក៏ពិតមែន ប៉ុន្តែ មុខរបរចិញ្ចឹមមាន់នេះ វាពិតជាងាយស្រួលក្នុងការចិញ្ចឹម ដោយគ្រាន់តែឆ្លៀតពេលទំនេរបន្តិចៗក្នុងមួយថ្ងៃ ក្នុងការឲ្យចំណី ឬមើលថែផ្សេងៗ ។ យ៉ាងណាមិញ កសិកររូបនេះនៅតែមានការព្រួយបារម្ភពីទីផ្សារមាន់ធ្លាក់ចុះ ដោយសារតែឈ្មួញកណ្តាលទម្លាក់តម្លៃ ហើយមុខរបរចិញ្ចឹមមាន់នេះក៏កាន់តែមានច្រើនទៅៗនៅតាមខេត្តនានា ៕
